Уралдах морь, сорилдох хүүхэд

Морийг сойхгүй уралдвал бахардана.
Хүүхдийг дасгахгүй сорилдвол бүтэлгүйдэнэ.


2019 оны 5 дугаар сарын 31-ний өдөр

ЭЭЖЭЭ САНАСАН СЭТГЭЛ

                                Ээжээ санасан сэтгэл

             Ээжээ, би таныгаа,

Намиран хийсэх  навчны сүүлчид уусаж санана.

Нартыг гоёх цэцэгсийн шүүдэрт нэвчиж  үгүйлнэ.

Анирлан бутрах цасны ширхэгт шингэж  дурсана.

Алсаас ирэх шувуудын шуугианд нэгсэж дуурсана.

 

 Дахилт?

 

             Ээжээ, би таныгаа, 
 

           Уулс хөлрөх өдрийн сэтгэлдээ ургуулж санана.          

            Үүлс хөглөрөх шөнийн бодолдоо тээж хононо.
            Үйлс өөдлөх үеийн урамдаа шингээж өнжинө.   
            Үүрээ орхих мөчийн аялгуундаа найрсгаж уулзана.

            Ээжээ, би таныгаа,

            Ирсэн цагийн хоромыг илээж санана.
            Орших мөчийн эгшинг урсгаж санана.
            Одох үеийн  орчилыг урагшуулж санана.
            Эргэх эсэхийн дэнсийг нэхэж санана. 



           Ц.Лувсандорж 

            2018 оны 5 дугаар сарын 9-ний өдөр
           

Ээж

               


                         Ээж

Зүрхний минь хүйн уяа

Зүүдний минь хүүн учрал

Хайрын минь эх үлгэр

Харцны минь зөөлөн аяс 

              Ээж
  Яргуй ирэх цагийн бодрол
  Навчис сэрчигнэх мөчийн дурсамж
  Цэцэгс бүжиглэх хоромын баясал
  Цас бутрах эгшиний нэгсэл

                        Ээж
            Сэтгэлийн минь эх хөг

Дууны минь зөөлөн өнгө

Халамжийн минь ээж үлгэр

Нулимсны минь эх дусал

                 Ээж

            Уулс хөлөрсөн өдрийн сэтгэлийн эгшиг
            Үүлс хөглөрсөн шөнийн итгэлийн дөл
            Үйлс хөглөгдсөн цагийн урамын эрч
            Үүрээ орхисон мөчийн аялгуун эх

                          Ээж

Бодлын минь алтан эгшин

Бичвэрийн минь гэгээн мөр

Үйлсийн минь хайрын зам

Амьдралын минь эх булаг 

                          Ээж  

            Угтах аялгуун эхний тоглогч
            Орших замын гэгээн хөтлөгч
            Буцах цагийн буурал угтагч
            Эргэх мөчийн энэрэлт урлаач

                           Ээж 

           Ц.Лувсандорж 

            2018 оны 5 дугаар сарын 5-ны өдөр
           

 

 

Саран жигүүрээ ургаж гүйцэхээр
Сайхалтын нуурнаас шувууд буцлаа
Саруул эрдмийн дээж хүртэхээр
Сарын газраа хүү тань мордлоо

Уул усаа эрэн тэмүүлсээр
Урьхан хавар шувууд ирнэ.
Унаа цуцам алсын нутгаас
Учралт хүү нь ээжээ зорилоо.



           
             

Ардчилал оролцоо

Оролцоо ардчилал. Түнэр харанхуйд унтаж байгаа түмэнд ардчилал байхгүй. Асуудал бүрээр сэрж оролцдог олонд бол харин ардчилал бий. Ардчилал оролцоо л юм.


Ц.Лувсандорж

2018 оны 5 дугаар сарын 4-ний өдөр