Хайр

Үнэн хайр мөнхийн хайрын үлгэр оюутан                    цагийн хэдхээн андынхаа гэгээн үехлийг дурсан дуурсган энэхүү мөрүүдийг тэрлэв.

                                                             Хайр

Холдох тусам тодорч бодогддог

Өтлөх тусам нялхарч мэдрэгддэг

Зөнд баригдаж зүүдэнд ирдэг

Бодолд өнжиж нойр хулжаадаг

Үг үгүй өнгө үгүй

Үлгэр үгүй нөхцөл үгүй

Үнэн хайр мөнхийн хайр

Мөнхийн хайр үнэн хайр

Сэтгэл алдарсан зүрхэнд амилдаг

Өр нимгэрсэн харцанд илэрдэг

Малгайлах цасны хэмэнд шивнэдэг

Сэвэлзэх салхины аясад эгшиглэдэг

Буруу үгүй зөв үгүй

Гэмшил үгүй нэхэл үгүй

Мөнхийн хайр үнэн хайр

Үнэн хайр мөнхийн хайр

Буурал намрын хонгор салхитай хамт

Будант өдрийн бороо манантай хамт

Үргэлж санагалзах төөрөг тавилантай хамт

Чимээгүй аяараа урсах нулимстай хамт

Зовлон үгүй жаргал үгүй

Эртдэхгүй оройтохгүй

Үнэн хайр мөнхийн хайр

Мөнхийн хайр үнэн хайр

Ц.Лувсандорж

2015 оны 12-р сарын 14-ний өдөр

Шувуу шиг ид

Шувуу шиг 


Шувуу шиг идвэл
Шувуу шиг хөнгөрнө

Гахай шиг идвэл
Гахай шиг хүндэрнэ.

Хөнгөн шувуу нисдэг
Хүнд гахай хэвтдэг
Нисдэг нь цэнгэдэг
Хэвтддэг нь өвддөг.

Өвдөхийн эх ч идэхээс
Цэнгэхийнх ч тэрнээс
Хөнгөн нь шувуу лугаа
Хүндхэн нь гахай лугаа

Гахай шиг хүндэрнэ
Гахай шиг идвэл.
Шувуу шиг хөнгөрнө
Шувуу шиг идвэл.


Ц.Лувсандорж

2017 оны 7 дугаар сарын 25-ны өдөр

Бодол шиг урсах амьдрал

  Бодол шиг урсах амьдрал

Үлгэр шиг өрнөх амьдралаа, би

Үргэлж өнгөлж чадлуу даа

Үйлэн үртэй замыг, би

Үнэн чандлаж тууллуу даа.

Нулимстад  ганцхан  ижийгээ

Дандаа  хайрлаж явлуу даа

Нартад ганцхан аавийгаа

Дээдлэн асарч  үзлүү дээ

 Орчлонд нэгхэн  багшийнхаа

 Өгснийг өргөж дэвшлүү дээ

 Орчил  нэгт  түмнийхээ 

 Түшснийг өсгөж дэвжлүү дээ

Бороо шиг асгарах нулимсаа

Дэнсэлж  нэг хэмжлээ дээ, би.

Бодол шиг урсах амьдралаа

Цэгнэж  ингэж л шинжлээ дээ, би

Ц.Лувсандорж 

2017 оны 7 дугаар сарын 21-ний өдөр

Хоёр сагсгар

           

  
                               Мурих бичгийг сурах бичиг гэх
                               Хоёрын тоог  оюутан гэх

                               Буруу бодлогыг  цэцэн  гэх

                               Бүтэлгүй нэгэн удирдагч гэх

                               Намчинг номчин гэх болтлоо дордсон боловсролын салбарт 

                               ийм сагсгар хоёр биш харин олоон бий.  

                               Сагсгар сагсалцахын хор нөлөөг найман мөрөөр "Хоёр сагсгар"-т

                               хэлэх гэж оролдов.

  

  

            Хоёр сагсгар

Арга зүй үгүй агуулга үнэгүй

Агуулга үгүй аргазүй цэнэгүй

Цэнэгүй аргазүй нэг сагсгар

Үнэгүй  агуулга  бас сагсгар

Хоёр сагсгар сагсалцахад

Хий хоосон цутгагдана.

Хоёрын тоо элбэгшинэ.

Худал, хуурмаг цэнэлэгдэнэ.

Ц.Лувсандорж 

2017 оны 7 дугаар сар 20-ны өдөр 

 http://monaphorism.blogspot.com/2017/07/blog-post_19.html

Сэтгэл, зүтгэл, ухаан

Сэтгэл дутахад зүтгэл үгүй.
Ухаан дутахад зүтгэл үргүй.

2017 оны 7 дугаар 19-ний өдөр

Хийх, хийрхэх

Хийдэг  бүтээдэг.
Хийрхдэг бүтэлгүйтдэг.

Ц.Лувсандорж 

2017 оны 7 дугаар сарын 16-ны өдөр 

Дорны анир дор

              Дорны анир дор

Мэлтэлзэх сартай дорны шөнийн  одон нөмрөгтэй тэнгэрийн дор 

Хурмастын нандин эгшигтэй шөнөжин найрсаж хөгжинө. 

.....

Дорны шөнийн анир дор

Шөнөжин найрсаж хөгшинө.

Сэвэлзэх салхитай дорны өглөөн сарны мөртэй нарны дор  

Гэрлийн мөнгөн цацрагтай өглөөжин наадаж цэнгэнэ.

....

Дорны өглөөн анир дор

Өглөөжин наадаж цэнгэнэ.

Анирлах орчилтой дорны өдрийн далайн өмсгөлтэй огторгуй дор

Огторгуйн цагаан аялгуутай өдөржин хоршиж дуулна.

....

Дорны өдрийн анир дор

Өдөржин хоршиж дуулна.

Шиврэх бороотой дорны үдшийн солонгон чимэгтэй үүлсийн дор 

Уулсын хөлөрсөн шүүдэртэй үдшийн бүрийд бүжнэ.

Дорны үдшийн анир дор 

Үдшийн бүрийд бүжнэ.

               Ц.Лувсандорж 

2017 оны 7 дугаар сар 15-ны өдөр

Ирээдүйн Наадам

 Ирээдүйн Наадам

Ирээдүйн Наадам ногоон
Ирээдүйн Наадам цагаан
Ирээдүйн Наадам ирээдүй
Ирээдүйн Наадам цэнгэл

Одоогийн наадам махан
Одоогийн наадам мөнгө
Одоогийн наадам өнгөрсөн
Одоогийн наадам тэмцэл

Махан учраас зовлон
Мөнгө учраас шунал
Өнгөрсөн учраас алдаа
Тэмцэл учраас зөрчил

Ногоон учраас амгалан
Цагаан учраас  нөхөрлөл
Ирээдүй учраас тэмүүлэл
Цэнгэл учраас инээд баясал


Ц.Лувсандорж

2017 оны 7 дугаар сарын 13-ны өдөр 

Эгшин

        Эгшин 

 

Нас хэлтийх мөч

Нартын замыг хүүрнэнэ

Сар мэлтийх шөнө

Чанадын жамыг шивнэнэ.

Үсэнд буусан сор

Оршиж одохыг  дуурсгана.

Усанд унасан сар

Одож оршихыг дуулгана.

Андын өтөлсөн дүр

Туулсан эгшинг тоолно.

Алсад анирлах одод

Дуулсан, уйлсныг тольдоно.

Амьдарч тоолсон эгшин

Алдаж оносныг гэрчилнэ.

Алдарч эхлэх агшин

Анирлах, буцахыг дэнслэнэ.

Алдаж онохын гэрч

Эгшин бүрийг цэгнэнэ.

Анирлах буцахын дэнс

Агшин бүрийг гамнана.

 Мэлтийх сартай шөнө

Чанадын жамыг мэдэрнэ.
Хэлтийх настай үе

Нартын замыг мэднэ.

Ц.Лувсандорж 

2017 оны 7 дугаар сарын 13-ны өдөр 

Шаргат морьтын зуслан