Thursday, August 6, 2020

Ээж орчлон

 

          Ээж орчлон

 

Тогоруун дэнж нутгаа зүүдэлнэ.

Толгодын дунд тоонот минь тодорно.

Тогоондоо сүү сүлэрч үнэртэнэ.

Тотгоны цаахан ээж минь сүүмэлзэнэ.

Дэлхийн дэнж нутгийн зүүдэнд

Нутгийн цэнэтэй ээж минь эргэнэ.

Оройн дээд ээжээ дуудна.

Оргил мөнгөн уулс минь өндөлзөнө.

Энгэртээ цэцэгс эрхэлж дэлбээлнэ.

Тэнгэрийн наахан нутаг минь зэрэглээтэнэ.

Энэрлийн дээд ээжийн зүүдэнд

Ээжийн энтэй нутаг минь ирнэ.

Орчлонгийн сувд дэлхийгээ дуулна.

Өн мөнхийн сар минь ханьсана.

Орчилдоо эрхэс чуулж дуулна.

Ододын дунд ээж минь гэрэлтэнэ.

Сувдан цэнхэр дэлхийн зүүдэнд

Орчлонгийн эх ээж минь гэрэлтэнэ.

 Ц.Лувсандорж

2020 оны 7 дугаар сарын 22-ний өдөр

Шарга морьтын зуслан

 

 

Ээж орчлон

 

Ээж орчлон

Тогоруун дэнж нутгаа зүүдэллээ.

Толгодын дунд тоонот минь  тодорлоо.

Тогоондоо сүү сүлэрч үнэртлээ.

Тотгоны цаахнаа ээж минь сүүмэлзлээ.

Дэлхийн дэнж нутгийн зүүдэнд

Нутгийн цэнэтэй ээж минь эргэлээ.

Оройн дээд ээжээ дуудлаа.

Оргил мөнгөн уулс минь өндөлзлөө.

Энгэртээ цэцэгс эрхэлж дэлбээллээ.

Тэнгэрийн нааханаа нутаг минь зэрэглээтлээ.

Энэрлийн дээд ээжийн зүүдэнд

Ээжийн энтэй нутаг минь ирлээ.

Орчлонгийн сувд дэлхийгээ дууллаа.

Өн мөнхийн сар минь ханьслаа.

Орчилдоо эрхэс найрсаж чууллаа.

Ододын дунд ээж минь байлаа.

Сувдан цэнхэр дэлхийн зүүдэнд

Орчлонгийн эх ээж минь буулаа.

 Ц.Лувсандорж

2020 оны 7 дугаар сарын 22-ний өдөр

Шарга морьтын зуслан

Friday, May 15, 2020

ОРОЙН ГАНЦ МОД

ОРОЙН ГАНЦ МОД


Арын ганц модонд
Ангир шувуу халина.
Айлын бүсгүйн аалинд
Амраг сэтгэл хайлна.
 
Энгэрийн гандуу модонд
Элээ шувуу эргэнэ.
Энхрий хайлган харьцанд
Элэг зүрх уяарна.
 
Оройн ганц модонд
Олон шувуу чуулна.
Олноос гойд хайранд
Бодол өнжин дуулна.
 
Ц.Лувсандорж
2020 оны 5 дугаар сарын 16-ны өдөр
Шаргат морьтын ганц модот

Friday, March 6, 2020

Монгол Анир

Монгол Анир

Чад чад үсрэх оч

Час час хагарах мөс

Чар чар дуугарах цас

Чахар чахар найгах мод

Гялс гялс анивчих од

Гялт гялт анирлах хяруу

Мэлтэс мэлтэс гэх нуур

Мэлс мэлс мандах сар

Тэс тэс хөлдөх гол

Түс түс түрэх түрлэг

Түс тас хийх аянга

Түр тар дугарах тэнгэр


Сэр сэр сэвэлзэх салхи

Сэм сэм ширтэх харц

Шив шив гэх шивнээ

Шивэр шивэр орох бороо


Бур бур бувтнах үрс

Фүр фүр буцлах цай

Пүр пүр исэх тараг

Хүр хүр илдэх сур


Ход ход инээх нялхас

Хор хор хоржигнох горхи

Хос хос орших амьдрал

Хол хол зусах айл

     Ц.Лувсандорж

2015 оны 12 дугаар сарын 23-ны өдөр 
 Шарга морьтын зуслан

Эгшин эргэдэггүй тул ирэхэд ихэд эрхэмлэ.

 Эгшин эргэдэггүй.
  Ирэхэд эрхэмлэ.


2020 оны 3 дугаар сарын 6-ны өдөр

Friday, February 28, 2020




Түмэн хүн мунхаглалын далайд живэхээр уралдан олноороо унаж байхад ядаж нэг хүн эрэг дээр эргэцүүлж зогсож байвал тэр улсад ирээдүй бий.


 

Monday, February 24, 2020

Өргөж угтдаг эх орон

      Өргөж тосдог эх орон

Үргээд хулжихад тань уйлаад үддэг
Уйлаад эргэхэд тань нь өргөж угтдаг
Газар дээр ганцхан эх орноо гамна.

Ядрахдаа түүнийг бүү орхи.
Чадрахдаа үүнийг бүү зар.
Чадвал тэгээд нэмэр бол.
Хөгжихдөө  хөг аяс нэм.

Дэлхийн дэнж эх нутгаараа
Ертөнцийн хавар дэлхийгээ тэтгэ.
Дэлхийд ганцхан эх орноороо
Ертөнцийн сувд дэлхийгээ гоё.

Газар дээр ганцхан эх нутгаа гамнан хайрла.
Уйлаад эргэхэд тань тэр л чамайг үргэлж тосно.
Үргээд хулжихад тань тэр чамайг уйлаад үднэ.

Ц.Лувсандорж

2020 оны 2 дугаар сарын 25-ны өдөр